“მეცნიერებათა სკოლა” მასშტაბურ საჭადრაკო ტურნირს გეგმავს

“მეცნიერებათა სკოლა“ საგაზაფხულო სეზონს სიახლეებით ხვდება. სკოლის ადმინისტრაციისა და ჭადრაკის სექციის ინიციატივით, დაგეგმილია მასშტაბური ტურნირი, რომელშიც ჩართვის შესაძლებლობა, შიდა სასკოლო საზოგადოებასთან ერთად, სხვა სკოლების მოსწავლეებსაც ექნებათ.

პროექტის მთავარი მიზანი ინტელექტუალური თამაშის პოპულარიზაცია და ახალგაზრდებში ანალიტიკური უნარების განვითარებაა. როგორც ჭადრაკის პედაგოგი ნინო ხარაული აღნიშნავს, ეს სპორტი ბავშვის ფორმირებაში გადამწყვეტ როლს ასრულებს:

“ჩვენი მიზანია ჭადრაკი კიდევ უფრო პოპულარული გავხადოთ მოზარდებში. ეს არის პროცესი, რომელიც ბავშვებში ლოგიკურ და სწრაფ აზროვნებას ავითარებს, ასწავლის მათ გადაწყვეტილების დამოუკიდებლად მიღებასა და სტრატეგიულ დაგეგმვას. ტურნირი კარგი შესაძლებლობა იქნება მოსწავლეებისთვის, გამოსცადონ საკუთარი ძალები და შეიძინონ ახალი მეგობრები,“ – ამბობს ნინო ხარაული.

ორგანიზატორებმა ტურნირის მონაწილეებისთვის განსაკუთრებული სიურპრიზიც მოამზადეს. ღონისძიების ფარგლებში “მეცნიერებათა სკოლას” ესტუმრება ცნობილი გორელი მწერალი და მოჭადრაკე. მისი ვინაობა ამ ეტაპზე საიდუმლოდ რჩება და ბავშვებისთვის სასიამოვნო მოულოდნელობა იქნება.

სტუმარი მოსწავლეებს საკუთარ გამოცდილებას გაუზიარებს, ესაუბრება ლიტერატურისა და ჭადრაკის კავშირზე და მათ სიმბოლურ “მასტერკლასსაც“ ჩაუტარებს.

ტურნირის მასშტაბებიდან გამომდინარე, მასში მონაწილეობის მიღება სხვადასხვა სკოლის მოსწავლეებს შეეძლებათ, რაც პროცესს კიდევ უფრო აზარტულს და კონკურენტულს გახდის. გაზაფხულის სეზონზე დაგეგმილი ღონისძიების ზუსტი თარიღი და რეგისტრაციის პირობები სკოლის ოფიციალურ გვერდზე უახლოეს პერიოდში გამოქვეყნდება.